Romans 16

Pamego Fua

1Lau i'a afakua'a Kristiano papiega Febe Kenkrea ufapogai iifi e'agai epinauga auga fouga oi maamiai alaifania. 2Lau oi lagoinimi Lopia akagai, Deo ega papiau ala foifa koko oma'i eoma auga laoga mainai foifa koko'i. Ke lagoinimi pipalagai kapa oi eemiai feafia eoma auga isafa fopenia. Gome isa papiau ma'o epalagaini'i, ke lau isafa epalagai aloganiau.

3Ke papie aka Prisila ke au aka Akuila Iesu Kristo faugai lau fou apinauga au'i e'u pamego iifa'i fopeni'i. 4Isa lau fauai mae mauni epogai kelao kemai. Lau mo laa'i kai iifi e'a papiau'i Iudea papiau'i laa'i au'i ma'oai isafa isa tenkiu akaiki'a kepeni'i.

5Ke Kristiano papiau'i Prisila Akuila auni'i e'i e'ai kekaigugu au'i isafa lau e'u pamego iifa'i isa fopeni'i.

Ke lau ekefa'au Epaenetus Asia agogai eufai eponi Iesu Kristo epako'ania auga, lau e'u pamego iifa'i isa fopenia.

6Ke papie aka Maria oi faumiai epinauga kapula auga, lau e'u pamego iifaga fopenia.

7Ke aau akiu au'i au aka Andronikus, ke papie aka Junias auni'i lau fou atipula au'i, lau e'u pamego iifa'i fopeni'i. Ke apostolo ma'oai isa au akaiki'a'i kepamia'i, ke lau Iesu Kristo alapako'ania koa kai, isa keufai Iesu Kristo kepako'ania.

8Ke au aka Ampliatus, Lopia fou kemia kainai alou ko'agai anina laani auga, e'u pamego iifa'i fopenia.

9Ke Iesu Kristo faugai fou apinauga auga aka Ubanus, ke ekefa'au aka Stakis fou e'u pamego iifa'i fopeni'i.

10Ke au aka Apeles, Iesu Kristo faugai ke'opoisa, ke Kristiano auga ko'a emia auga, e'u pamego iifa'i fopenia.

Ke au aka Aristobulus ega famili au'i fou e'u pamego iifa'i fopeni'i.

11Ke aau akiu aka Herodion auga e'u pamego iifa'i fopenia.

Ke au aka Nasisus ega famili epo'iai Lopia fou kemia au'i e'u pamego iifa'i fopeni'i.

12Ke papie aka'i Trifaena, ke Trifosa Lopia faugai kepinauga alogaina papie'i, e'u pamego iifa'i fopeni'i.

Ke papie i'oina aga'o aka Pesis, lau ekefa'au Lopia faugai epinauga alogaina auga, e'u pamego iifa'i fopenia.

13Ke au aka Rufus, Lopia ekinaga auga, ke isa ina, lau isafa inau koa emia auga fou e'u pamego iifa'i fopeni'i.

14Ke au aka'i Asinkritus, Flekon, Hermes, Patrobas, Hermas, ke aa'a aki'a isa fou keagu au'i, e'u pamego iifa'i fopeni'i.

15Ke au aka Filolokus, ke papie aka Julia, ke au aka Nereus ke afakua, ke au aka Olimpas, ke Deo ega papiau isa fou keagu au'i ma'oai lau e'u pamego iifa'i fopeni'i.

16Ke alomi lolofagai aami akimi Kristiano papiau'i fopamegoni'i.

Ke Iesu Kristo ega iifi e'a papiau'i ma'oai e'i pamego iifa'i kepenimi.

17Aau akiu Kristiano papiaumi, lau oi lagoi kapula penimi, oi kapa'ina omaleleaina auga kainai akepea, ke oi epomiai ke'eaimi, ke emi pako'a kekaisapua au'i foisa felo'i. Ke ega'ina papiau'i fomuni'i. 18Gome ega'ina papiau'i auga, i'a a'a Lopia Iesu Kristo ega pinauga akekapa. Kai isa ifo'i inae'i mo pinauga kekapa. Isa nini'ani felogai, ke papiau alo'i fekeania auga nini'ani'iai papiau kapa'i kapa ma'oai keafi'i kepako'ani'i au'i kefoge'i. 19Lau ega laifa oma, gome papiau ma'oai oi iifa faunina Iesu fouga kainai opea auga fouga kelogo. Ega puo lau oi faumiai alou egama alogaina. Kai lau anina laani oi Deo maagai kapa'ina felo auga eegai foikifa. Kai Deo maagai kapa'ina apala auga oko fologo laoma. 20Ke Deo gagao inagome auga, afa'agamo Satani oi ifemi papagai agegafamu'a.

Lau lamegamega i'a a'a Lopia Iesu Kristo ega gafegafe akaiki'a oi eemiai feka laoma.

21Ke Timoti lau fou apinauga auga ega pamego iifa'i oi eemiai eulaisa. Ke lau aau akiu aka'i Lusius, Jason, Sosipater fou e'i pamego iifa'i oi eemiai keulai'i.

22Ke Tertius, lau kapa'ina laifania epapua auga, ega pamego iifa'i Lopia akagai oi eemiai eulai'i.

23Ke Kaius, lau ke iifi e'a papiau'i ma'oai egafegafe penimai auga ega pamego iifa'i eemiai eulaisa.

Ke Erastus, taoni papiau'i e'i pinauga e'ima'i auga, ke aa'a aki'a Kristiano auga Kuartus auni'i e'i pamego iifa'i eemiai keulaisa.

24Lau lamegamega i'a a'a Lopia Iesu Kristo ega gafegafe akaiki'a oi eemiai feka laoma.

25Lau iifa faunina Iesu fouga lainogonia auga, ke Iesu Kristo fouga laifafoua auga faagagai, Deo oi emi pako'ai foapa inokania fekaina auga ekapaisa. Lau kapa'ina lainogonia, ke laifafoua auga, Deo mo agepafokia auga, ufainagai Deo ega logoai eogefake. 26Kai Deo eague aoniamo auga eifa kapula peni'a kainai, profeta Deo ega iifa kepapua au'i faaga'iai ega'ina ogefake pau i'a maa'aisai epafokia epalogoni'a. Ega koa agofa'a papiau'i ma'oai Isa fekepako'ania, ke aina kainai fekepea eoma. 27Deo ega'ina ifogamo mo eikifa auga, Iesu Kristo faagagai au akaiki'a fapamia aoniamo. Amen.